ព្រះអាទិត្យរះនៅពេលងងឹត
អ្នកខ្លះយល់ថា ព្រះអាទិត្យរះនៅពេលព្រឹក តែការពិតទៅ ភពផែនដីបើគ្មានព្រះអាទិត្យ គឺងងឹតសូន្យ តែពេលដែលផែនដីវិលដល់ចំណុចដែលយើងរស់នៅ ក៏យើងឃើញថា ព្រះអាទិត្យរះមក ។ សន្មត់ថាព្រះអាទិត្យពិតជារះមក គឺរះមកនៅក្នុងពេលងងឹត ហើយព្រះអាទិត្យជាអ្នករះមកផ្ដល់ពន្លឺដល់ផែនដី។ ប្រសិនបើផែនដីមានពន្លឺស្រាប់ហើយ នោះព្រះអាទិត្យក៏មិនមានតម្លៃដែរ ។ ប្រៀបដូចទៅនឹងជម្ងឺកូវីដ១៩ ដែលកំពុងតែកើតមាននៅជុំវិញពិភពលោកនេះ បើសិនបើគ្មានកូវីដ មនុស្សក៏មិនត្រូវការវ៉ាក់សាំង និងថ្នាំព្យាបាលដែរ តែនៅពេលមានកូវីដ១៩ វ៉ាក់សាំងគឺជាវត្ថុមានតម្លៃ ។ នៅក្នុងន័យប្រៀបធៀប នៅក្នុងភាពវឹកវរ គឺមានឱកាស នៅកន្លែងដែលមិនល្អ អាចជាឱកាស សម្រាប់អ្នកមានសមត្ថភាពនៅក្នុងចំណោមមនុស្សល្ងង់ គឺជាឱកាសដ៏ល្អសម្រាប់អ្នកចេះដឹង ។ មិនថាអ្នកស្ថិតក្នុងស្ថានភាពបែបណាទេ បើអ្នកមិនបណ្ដោយទៅតាមស្ថានភាពនោះ គឺអ្នកអាចប្រើប្រាស់ស្ថានភាពមិនល្អ ដែលនៅជុំវិញខ្លួន ទៅជាឱកាសសម្រាប់ខ្លួនឯងបាន ។ សម្រាប់ព្រះធម៌វិញ នៅពេលដែលមនុស្សកំពុងតែមានភាពងងឹត វង្វេង គឺជាពេលដែលព្រះធម៌ មានតម្លៃមកបំភ្លឺជីវិត ប្រហែលមានតែមនុស្សដែលស្ថិតនៅក្នុងភាពងងឹតប៉ុណ្ណោះ ដែលនឹងរកឃើញពន្លឺ មានតែអ្នកដែលកំពុងរតែរងទុក្ខ ទើបស្វែងរកពន្លឺគឺផ្លូវរំលត់ទុក្ខតាមរយៈមាគ៌ានៃព្រះធម៌ ។
អត្ថបទនេះគ្រាន់តែចង់លើកទឹកចិត្ត ដល់អ្នកដែលស្ថិតនៅក្នុងស្ថានភាពលំបាក ដើម្បីកែប្រែជីវិត ឱ្យល្អ។
