ភាពជាមនុស្សមានឧបនិស្ស័យផ្សេងៗគ្នា

ភាពជាមនុស្សមានឧបនិស្ស័យផ្សេងៗគ្នា

 

 

មនុស្សម្នាក់មានភាពខុសគ្នា ច្រើនបែបច្រើនយ៉ាង ទាំងរូបរាងខាងក្រៅ ចិត្តគំនិត ចំណេះដឹង ចំណង់ចំណូលចិត្ត និងសតិបញ្ញា ។ អ្នកខ្លះកើតមកល្អទាំងរូប ល្អទាំងបញ្ញាស្មារតី អ្មកខ្លះក៏ល្អទាំងជីវភាព-គ្រួសារ អ្នកខ្លះកើតមកក៏លំបាក ឬអន់គ្រប់យ៉ាង អាចជាមានកាយសម្បទាមិបគ្រប់គ្រាន់ ឬខ្សោយបញ្ញាស្មារតី-ល-។ រាល់កំហុសឆ្គង ណាមួយកើតឡើង យើងក៏នឹងគិតថា មនុស្សនេះគួរតែបែបនេះ គួរតែបែបនោះ ប៉ុន្តែធាតុពិត អ្វីគ្រប់យ៉ាងគឺសុទ្ធតែគួរទៅហើយ ។ មនុស្សកើតមកទៅតាមឧបនិស្ស័យរៀងខ្លួន ទោះមិននិយាយថាឧបនិស្ស័យក៏អាចថា ទៅតាមភាពចៃដន្យរៀងៗខ្លួន មិនអាចរៀបចំដោយខ្លួនឯងបាន ក៏ប៉ុន្តែសម្រាប់ខ្ញុំផ្ទាល់ គឺខ្ញុំជឿលើកម្មផល គឺអ្វីៗប្រព្រឹត្តទៅតាមកម្ម អ្វីៗដែលមនុស្សទទួលគឺជាអ្វីដែលគេកសាងមក ។ អ្នកកើតមកល្អគឺមានឧបនិស្ស័យល្អ អ្នកកើតមកមិនល្អគឺមានឧបនិស្ស័យមិនល្អ ហើយពួកគេរាល់គ្នា ពិតជាមិនបានដឹងឡើយ មនុស្សកើតមកល្ងង់ គឺរឹតតែមិនដឹងថាខ្លួនឯងល្ងង់ ហើយមនុស្សកើតមកឆ្លាតក៏តែងតែមើលងាយ ធ្វើបាន បន្ទាបបន្ថោកអ្នកល្ងង់ គឺល្ងង់ដូចគ្នា ព្រោះតែមិនបានយល់ដឹងអំពីដំណើរនៃធម្មជាតិ គឺកម្មជាអ្នកចាត់ចែង ។អ្នកខ្លះកើតមកមានសំណាង មានបញ្ញាល្អ អាចបែងចែកខុសត្រូវល្អអាក្រក់បានល្អ អ្នកខ្លះកើតមកគ្មានសំណាង គឺបើទោះបូជាមានខួរក្បាលល្អ ទែកើតចំកន្លែងមិនល្អ ក៏នាំឱ្យខួរក្បាលក្លាយទៅជារបសអត់បានការ ។ នៅក្នុងសង្គមបច្ចុប្បន្ន តែតែកើតមាននូវការប្រកាន់សព្វបែបសព្វយ៉ាង បន្ទោសអ្នកនេះយ៉ាងនេះ បន្ទោសអ្នកនោះយ៉ាងនោះ នោះក៏ព្រោះតែ ទាំងអ្នកល្ងង់ទាំងអ្នកឆ្លាតគឺសុទ្ធតែមិនដឹង ថាខ្លួនឯងមិនដឹង គឺមិនដឹងអំពីដំណើររបស់វា ហេតុរបស់វា ដែលនាំឱ្យអ្វីៗទៅជាយ៉ាងហ្នឹង ។ គ្មានអ្វីមួយដែលមិនសមហេតុផលឡើយ អ្វីៗកើតព្រោះហេតុបច្ច័យដែលនាំឱ្យកើត រលត់ព្រោះហេតុបច្ច័យដែលនាំឱ្យរលត់ ឬថា អ្វីៗគឺមានសភាពធម្មតា ។

លើលោកនេះគ្មានអ្នកណាចង់ក្រ គ្មានអ្នកណាចង់លំបាក គ្មានអ្នកណាចង់ល្ងង់ តែដោយហេតុឧបនិស្ស័យនាំកំណើតមកខុសគ្នា រស់នៅក្នុងស្ថានភាពខុសគ្នា អ្វីៗក៏ខុសគ្នា តែមានចំណុចដូចគ្នាមួយគឺសុទ្ធតែជាមនុស្សដូចគ្នា ។ ដូច្នេះមិនគួរមើលបំណាំគ្នាទេ បើអ្នកមានសំណាងបានសិក្សារៀនសូត្រមានការយល់ដឹងគួរជួយពន្យល់អប់រំដល់អ្នកគ្មានឧបនិស្ស័យល្អដូចអ្នក ពួគគេគឺគួរឱ្យអាណិត។