ទម្រង់លិខិតរដ្ឋបាល

 

លិខិតបទដ្ឋាន និងលិខិតបទដ្ឋានគតិយុត្ត

 

I.លិខិតបទដ្ឋាន

អ្វីជាលិខិតបទដ្ឋាន?

            លិខិតបទដ្ឋាន គឺជាអត្ថបទច្បាប់គោលការណ៍ទាំងឡាយ សេចក្តីសម្រេចនានាដែលអង្គការ សង្គមដាក់ចេញសំដៅណែនាំ បញ្ជា ឬបទបញ្ញត្តិឲ្យផ្នែកពាក់ព័ន្ធតាមសត្ថកិច្ច ឬលិខិតស្នាមផ្សេងៗ រួមទាងលិខិតរបស់បុគ្គលសំដៅប្រើប្រាស់ក្នុងការផ្សព្វផ្សាយ ណែនាំ បញ្ជាក្នុងការគ្រប់គ្រងទំនាក់ទំនង ក្នុងផលប្រយោជន៍សាធារណៈ និងបុគ្គល ។

លិខិតបទដ្ឋានមានប៉ុន្មានប្រភេទ?

            លិខិតបទដ្ឋានចែកចេញជាបីប្រភេទគឺ៖

            ១. លិខិតបទដ្ឋាន គតិយុត្ត

            ២. លិខិតបទដ្ឋាន រដ្ឋបាល

            ៣. លិខិតបទដ្ឋាន ឯកជន

II.លិខិតបទដ្ឋានគតិយុត្ត

ដូ​ចម្តេចដែលហៅថាលិខិតបទដ្ឋានគតិយុត្ត?

            លិខិតបទដ្ឋានគតិយុត្ត​ ជាប្រភេទលិខិតដែលមានលក្ខណៈកំណត់ជាច្បាប់​ ជាគោលការណ៍ ជាបញ្ជាមានអានុភាព កំណត់បង្ខំឲ្យអនុវត្តក្នុងដំណើរដឹកនាំគ្រប់គ្រងវិស័យក្នុងសង្គម ។

លិខិតបទដ្ឋានគតិយុត្តចេញដោយសមត្ថកិច្ចណា?

            លិខិតបទដ្ឋានគតិយុត្តចេញដោយអង្គការរដ្ឋ​ អង្គការអន្តរជាតិ ក្រសួង ស្ថាប័នរដ្ឋ​ អង្គភាព សាធរណៈ អាជ្ញាធរដែនដីគ្រប់ថ្នាក់ អង្គការក្រៅរដ្ឋាភិបាល ឬផ្នែកឯកជនជានីតិបុគ្គល ។

លិខិតបទដ្ឋានគតិយុត្តចែកចេញជាពីរបែបគឺ៖

            ១. បែបបទបញ្ញត្តិទូទៅៈ សម្រាប់ប្រើក្នុងការកំណត់ បញ្ជា បង្កើត ណែនាំអនុវត្ត ។                          ២.បែបបទបញ្ញតិ្តឯកក្តភូតៈ សម្រាប់ប្រើក្នុងការតែងតាំងតំណែង មុខងារ ភារកិច្ច ដំឡើឋានន្តរ ស័ក្តិ ឬក្រុមរាប់ទាំងមន្ត្រីរាជការ ឬនិយោជិក​ ឬពលរដ្ឋគ្រប់ប្រភេទ ឬជនបរទេសផងដែរ ។

           លិខិតបទដ្ឋានគតិយុត្តិមាននាមករណ៍ច្រើន ហើយប្រែប្រួលតាមរបបនយោបាយ របស់ប្រទេស នីមួយៗ។

ឧទាហរណ៍ៈ

            របបសាធារណៈរដ្ឋនិយម                                របបរាជានិយម

- ក្រម                                                               -ព្រះរាជក្រម

-ក្រិត្យ                                                              -ព្រះរាជក្រិត្យ

-សារ                                                                -ព្រះរាជសារ

នាមករណ៍គតិយុត្តដែលយើងកំពុងប្រើប្រាស់ជាទូទៅមាន៖

-ព្រះរាជក្រម

-ព្រះរាជក្រិត្យ

-អនុក្រិត្យ

-សេចក្តីសម្រេច

-សារាចរ

-ដីការ

-………។ល។

            លិខិតបទដ្ឋានគតិយុត្តិ ដែលមាននាមករណ៍ខាងលើ គឺជាឋានានុក្រមដែលត្រូវចេញដោយ សមត្ថកិច្ចតាមថ្នាក់ តាមស្ថាប័ន តាមផ្នែកផ្សេងៗគ្នា រួមទាំងអនុភាពរបស់វាផង ។