គុណប្រែថាចម្រើន ចម្រើនគឺធ្វើឱ្យច្រើន ពីតិចទៅច្រើន ។ គុណ ក៏ជាអាវុធដ៏កាចសាហាវមួយរបស់មនុស្សសព្វថ្ងៃ យកមកប្រើដើម្បីចិញ្ចឹមជីវិត ។ មនុស្សសព្វថ្ងៃ ធ្វើគុណទៅលើនរណាម្នាក់ដោយទាមទារការតបស្នងមកវិញ ជាដាច់ខាត បើមិនបានមកវិញគឺនឹងត្រូវបានចោទប្រកាន់ថាមនុស្សក្រពើ ។ ហើយគោលបំណងដែលធ្វើទៅគឺធ្វើបានបានផលមកខ្លួនឯងវិញ ឯមនុស្សដែលទទួលរងគុណពីគេ គឺរងគំនានសង្កត់ដ៏ធ្ងន់ធ្ងរ ជាគំនាបសង្កត់ផ្លូវចិត្ត រស់នៅយ៉ាងលំបាក វេទនាផ្នែកផ្លូវចិត្ត បើមិនបានតបគុណទៅគេវិញទេ ទើបខ្ញុំចាត់ទុកថាគុណក៏ជាអាវុធដ៏កាចសាហាវមួយ ដែលមនុស្សទុចរិតប្រើ ។ បើអាចជៀសវាងបាន គួរតែជៀសវាងកុំទទួលគុណពីគេ ព្រោះវាជាបំណុល ជាបំណុលដែលកើនឡើង គឺច្រើនឡើងៗ ដែលនឹងត្រូវស្វែងរកអ្វីៗមកសងគេវិញ ទើបអាចរួចខ្លួន ។ ទទួលអ្វីតាមលទ្ធផលដែលខ្លួនឯងគួរបានទទួល កុំយកអ្វីលើសពីហ្នឹង ។
គុណដែលធ្វើដោយសេចក្ដីល្អ ដោយចាគៈគឺការលះបង់ ដោយមិនទាមទារធ្វីមកវិញទើបជាគុណជាតិមួយដ៏ល្អ ដែលប្រកបដោយមេត្តា ករុណា និងមុទិតា ។ គុណដ៏ល្អ ធ្វើទៅ ធ្វើដើម្បីសេចក្ដីសុខចម្រើន ពីម្នាក់ទៅម្នាក់ ហើយក៏វិលមករកខ្លួនឯងវិញដោយឥតចាំបាច់ទាមទារ ហើយវាពិតប្រាកដជាបានទទួលនូវអ្វីដែលខ្លួនឯងបានធ្វើ គឺជាកម្ម ជាច្បាប់ធម្មជាតិ ជាច្បាប់ដ៏យុត្តិធម៌បំផុត។ សាងល្អគឺបានល្អ តែសាងល្អដើម្បីបានផល មិនហៅថាសាងល្អទេ ហៅថាការរកស៊ី រកស៊ីដោយលក់គុណ។ អ្វីៗកន្លងមកដែលខ្ញុំឱ្យទៅអ្នកដទៃ បើអ្នកបានអានអត្ថបទនេះ បានទទួលហើយ សូមប្រាប់ថា វាជាអ្វីដែលខ្ញុំមិនរំពឹងការតបស្នងឡើយ អ្វីដែលខ្ញុំអាចឱ្យបានខ្ញុំនឹងឱ្យ ខ្ញុំឱ្យជាការចែករំលែក ឱ្យបានសុខចម្រើន។
No comments:
Post a Comment